Aisa Kyun Hai Hindustan

Jab laakhon hain bhagwan to aisa, kyun hai hindustan,
Anginat mile vardaan to aisa, kyun hai hindustan

Hum vishwaasi bharatwaasi,
Har pag sheesh jhukaate hain
Itna aadar insaan to kya, patthar bhi pooje jaate hain
Laakhon sadhu laakhon yantar,
Hain pag pag par jaadu mantar
Itne swami, chele karod, hai paas unke har jod tod
Damru duggi, gal me maala
Sar pe bhaboot, keshon waala
Tota bataa raha hai future,
Ik mota pooch raha dar dar
Kya pashchim mein ghar ki khidki
Ya poorab mein hai furniture
Jab itna saara gyaan,
To aisa, kyun hai hindustan..

Lootane waale khade raah mein
Lutne waale badi chaah mein
Peechhe waale soch rahe hain
Bade faayde me agle,
Jiske Kaan ho woh sun le

Koi chauka chhakka maar de to
Mandir unke ban jaate hain
filmon mein hit ho jaayen to
Unko bhagwan bulaate hain
Unke bhi mandir bante hain,
Aur pooja aarti sajti hai..
Gaye jaate hain bhajan geet,
Kya hum logon ki bhakti hai.
Insaan ko bolen param pooj,
Charnon ko dho ke peete hain..
Hum aise kitne babaon ke
Aashirwaad se jeete hain.
Jo maange inko milta hai,
Jo chaahen woh karvaate hain.
Insaan bana bhagwan to aisa, kyun hai hindustan…

Ik aur naya avtaar janam,
Apni dharti pe leta hai
Har paanch saal me aata hai
Haan theek kaha ji neta hai
Yeh dono haath se leta hai
Aur kabhi na waapas deta hai
Mazhab ke naam pe leta hai,
Bhaasha ke naam pe leta hai
Ladwaata hai, marwaata hai,
Jalwaata hai, katwaata hai
Jab kaam bane na apnon se,
Yeh dushman se mil jaata hai
Iske bhi laakhon bhakt yahaan,
Aur sewak iske wafadaar
Raja ke ek ishaare pe
Yeh desh jala den baar baar
Neta ki aisi shaan, to aisa kyon hai Hindustan..

Lekin kahin pe ik saccha rab,
Woh aasmaan mein rota hai
Kehta hai yeh kya mere naam se
Is jahaan me hota hai
Ban gaye khuda insaan sabhi
Bhoolen hai meri shaan sabhi
Jo kehta hai mere sach ko,
Sooli mein gadhte hain usko
Dharti pe gar main jaaunga,
Mujhko bhi na pehchaanenge,
Hai chamatkaar ko namaskar,
Sacchhai kya ye maanenge
Paisa khuda hai, shohrat khuda hai,
Taaqat khuda hai, yeh kya hua
Lo maine bhi ab chhod diya,
Aur apne mukh ko mod liya
Jab rooth gaya bhagwan
To phir kya, hoga hindustan..